"Sabah" Azərbaycan Premyer Liqasının 18-ci turunda səfərdə "Qəbələ"yə 0:1 hesabı ilə məğlub olub.

Sportliqa.az xəbər verir ki, Masazır təmsilçisinin baş məşqçisi Murad Musayev matçdan sonra keçirilən mətbuat konfransında jurnalistlərin suallarını cavablandırıb:

- Demək olar ki, oyun üstünlüyü bizim tərəfimizdə idi. Amma bu üstünlük, yaradılan fürsətlər yetmədi ki, heç olmasa bir xal qazanaq. Bir şeyi də qeyd etmək istəyirəm ki, əvvəllər biz öldürücü komandaya sahib idik. Yarım qol şanslarından belə istifadə edib qol vura bilirdik. İndi bu keyfiyyətlərimizi itirmişik. Oyunçularla yanaşı biz məşqçilər də daha çox çalışmalıyıq.

- Keyfiyyətin düşməsinin səbəbi nədir?

- Komanda yenilənib. Əvvəlki qələbəyə olan aclığımız itib. Mənim məşqçi kimi vəzifəm o istəyi və arzunu qaytarmaqdır. Bunun üçün çalışacağıq.

- Bu gün qapıda Rüstəm Samiqullin idi. Bu seçimin səbəbi nə idi?

- Bu, qapıçılar üzrə məşqçinin seçimi idi. Biz də onunla razılaşdıq.

- "Sabah"ın penaltilərdə bəxti gətirmir. Bu problemi necə həll etməyi düşünürsünüz?

- Psixoloji amildir. Özümüzü məhv etməklə məşğuluq. Öz qapımıza 3 qol vurmuşuq. Bu, olmamalıdır. Avtoqollar bizi 7 xaldan məhrum edib.

- Əvvəllər komandada əsas qapıçı var idi. İndi isə hər üçünə şans verirsiz. Seçim edə bilmirsiz?

- Nicat Mehbalıyev zədələndi. Bu gün Rüstəmə şans verdik.

- Anatoli Nuriyev penaltini yerinə yetirə bilməyəndən sonra əvəzləndi. Bu, əvvəlcədən hazırlanmış əvəzetmə idi?

- Bəli, planlaşdırılmış əvəzetmə idi.

- Komandanızın mövsümün ilk yarısındakı performansını necə dəyərləndirirsiz? Nə baş verib ki, "Sabah" qeyri-stabil çıxış edir. Coy Lens Mikels və Aleksey Kaşukun gedişi ilə bağlı ola bilər?

- Abdullaye Ba da önəmli oyunçu idi. Çox faktorlar var. Niyə belə oldu, hazırda cavab verə bilmirəm. Bütün bunların günahkarı baş məşqçidir. Fərqli səbəbləri var. Ötənilki "Sabah"ı unutmaq lazımdır. Artıq o "Sabah" olmayacaq. Bəzi transferlərimiz təlim-məşq toplanışına qoşula bilmədilər. 3-4 ay məşq etməyən oyunçular var idi. Bəzilərinin adaptasiyası istədiyimiz kimi getmədi. Mənim də səhvlərim var.