"Sumqayıt" Azərbaycan Premyer Liqasının 12-ci turunda doğma meydanda "Araz-Naxçıvan"ı 2:0 hesabı ilə məğlub edib.

Sportliqa.az xəbər verir ki, "kimyaçılar"ın baş məşqçisi Samir Abasov matçdan sonra keçirilən mətbuat konfransında jurnalistlərin suallarını cavablandırıb:

- "Qəbələ" ilə matçdan sonra bir az təzyiq altında idik. Həm xal itirdik, həm də oyunçularımızı.  Əsas heyətin dörd üzvünün oynamaması təsirsiz ötüşə bilməzdi. Amma onların yerinə oynayanlar özlərini pis göstərmədilər. Yaxşı futbol göstərdik. Hesab böyük ola bilərdi. Bu qələbə kimlərəsə təəccüblüdürsə, onların anlayışı elə bu qədərdir. Təəccübdə də qalsınlar. "Sumqayıt" layiqli qələbə qazandı. Yüksəlişdə olan komandayıq. Bunu qəbul etmək istəmirlərsə, ölüb qalsınlar.

- Bir az müəmmalı danışdınız. Ünvan çəkə bilərsiniz?

- Özünə çatdı.

- Matç bitən kimi klub prezidenti ilə görüşdünüz. Bu, nə ilə bağlı idi?

- Sabahkı planlarımızla, futbolçuların bərpası ilə bağlı idi. Bilirsiz ki, biz bərpanı burada keçirik. Sabah üçün başqa şeylər istədik. 8 gündə 3 oyun keçirdik. Millidən gələnlər 13-14 gündə 5 matça çıxıblar. Klub tərəfindən heç bir istəyimiz rədd edilməyib.

- Ünvanladığınız fikirlər sizi tənqid edən jurnalistlərədir?

- Yox. Mən saytları oxumuram. Bilmirəm kim məni tənqid edir. Sadəcə mən anlamıram ki, təəccüb nədən irəli gəlir. "Sumqayıt"ın qələbələrinin təəccüblü olmasını bir futbol adamı kimi anlamıram, anlamaq da istəmirəm.

- Sizin qulağınıza çatan fikirlər sizcə, hər iki komandanın turnir cədvəlindəki mövqeyi ilə bağlı deyil?

- Bizim bəlamız da budur, turnir cədvəlinə görə analiz olunur. Xal fərqinə baxın. Bizim ikinci yerdə olan "Zirə" ilə 3 xal fərqimiz var. Əgər hər şeyi turnir cədvəli ilə ölçəcəksizsə, atın bu peşəni.

- Ninqanın durumu necədir?

- Ona xüsusi təşəkkür düşür. O ağrılarla oynayasan, özün də legioner olasan. Elə legionerlər var ki, dırnağına qara düşən kimi deyir zədəliyəm. Bəlkə də onu ilin sonuna kimi itirdik.

- Murata 90 dəqiqə oynamağa hazırdır?

- Bu gün ən yaxşılardan idi. Həmin bölgədə yaxşı rəqabət var.