Dünya Güləş Birliyi bu ay Bakıda Avropa Olimpiya təsnifat turniri çərçivəsində keçirilən Turan Bayramov - Frank Çamizo görüşü ilə bağlı qərarını açıqlayıb.

Sportliqa.az xəbər verir ki, qalmaqallı görüşün hakimləri cəzalandırılıb.

Hakim səhvlərinin olduğu qənaətinə gələn qurumun qərarına əsasən, Roman Pavlov və İbrahim Cicioğlu bu ilin dekabrına qədər turnirlərdən uzaqlaşdırılıb. Ali Sayvanın cəzası isə 2024-cü ilin 30 sentyabrına qədərdir. Aleksey Bazulin, Kamel Buaziz və Keysi Qoessl isə 30 iyuna qədər referilik edə bilməyəcək. 

Qeyd edək ki, sözügedən görüş rüşvət iddiası ilə gündəmə gəlmişdi. Belə ki, Frank Çamizo uduzması üçün ona 300.000 ABŞ dolları məbləğində rüşvət təklif edildiyini bildirmişdi. Onun bu iddiasına finalda uduzduğu Turan Bayramov cavab verərək fatkla danışmağı məsləhət görmüşdü.

Azərbaycan Güləş Federasiyası da məsələyə münasibət bildirərək, “Çamizo “Duty to report” qaydalarına əsasən, belə bir rüşvət təklifinin olmasıyla əlaqədar dərhal etiraz protokolunda öz qeydlərini etməliydi. İndi ya o öz iddiasını sübuta yetirməli, ya da bu iddianın əsassız olduğunu bildirməlidir” açıqlamasını yaymışdı.

Qərarda Beynəlxalq Güləş Qaydalarının 53-cü maddəsinə görə, xalçada qalib elan edildikdən sonra heç bir halda nəticənin dəyişmədiyi bildirilib. Bununla yanaşı, UWW-dən İstanbulda mayın 9-da start götürəcək Dünya Olimpiya Təsnifat Turnirində Çamizonu çəki dərəcəsində 1-ci olmasını xahiş edilib.

Frank Çamizo qərarı alqışlayıb: “Dünya Güləş Birliyinə təşəkkürümü bildirirəm. Bu ədalət təmsilçiləri güzgüdə özlərinə necə baxırlar? Tanrı hamımızı izləyir, bundan sonra da var gücümlə çalışacam və haqsızlığı geridə qoymaq üçün özümdə güc tapacam”.