Albaniyanın paytaxtı Tiranada güləş üzrə Avropa çempionatı davam edir.

Sportliqa.az xəbər verir ki, bu gün Azərbaycanın daha 3 qadın güləşçisi mübarizəyə qoşulub.

Jalə Əliyeva (57 kq), Ruzanna Məmmədova (62 kq), və Birgül Soltanova (65 kq) xalça üzərinə çıxıb.

Onlardan Əliyeva və Soltanova yarımfinala vəsiqə əldə edib, Məmmədova 1/4 finalda məğlub olub.

Yarımfinal görüşləri saat 18:30-dan etibarən İTV-də canlı yayımlanır.

Xatırladaq ki, Azərbaycan komandası əvvəlki günlərdə 5 medal qazanıb - Yunan-Roma güləşçilərindən Həsrət Cəfərovla (67 kq) Qurban Qurbanov (82 kq) qızıl, Rəşad Məmmədov (55 kq), Nihat Məmmədli (60 kq) və İslam Abbasov (87 kq) bürünc mükafat əldə ediblər.

Qitə birinciliyi aprelin 26-da yekunlaşacaq.