Bu gün AFFA İntizam Komitəsinin iclası keçirilib.
Sportliqa.az xəbər verir ki, iclasda Misli Premyer Liqasının 29-cu turundakı qayda pozuntuları ilə bağlı qərarlar qəbul edilib.
“İmişli” – “Sumqayıt” oyununda “İmişli”dən 5 nəfər sarı vərəqə aldığı üçün klub 700 manat cərimələnib.
Həmin oyun “Sumqayıt”ın formasında qüsurlar olması səbəbindən gec başladığına görə "gənclik şəhəri" təmsilçisi 1500 manat cərimə edilib.
Bu matçda “Sumqayıt” azarkeşləri tərəfindən futbolçuların ünvanına kütləvi şəkildə təhqiramiz ifadələr səsləndirildiyinə və bu hal cari mövsümdə 4-cü dəfə təkrarlandığına görə klub 8000 manat cərimələnib.
Eyni görüş bitdikdən sonra “Sumqayıt” azarkeşləri tərəfindən pirotexniki vasitədən istifadə edildiyinə görə “Sumqayıt” 3000 manat cərimə edilib.
“Şamaxı” – “Kəpəz” oyununda “Kəpəz”dən 5 nəfər sarı vərəqə aldığı üçün klub 700 manat cərimə edilib.
“Neftçi” – “Qarabağ” matçının 90+3-cü dəqiqəsində “Neftçi” azarkeşləri tərəfindən meydanaçaya kənar əşyalar atıldığına və bu hal cari mövsümdə 6-cı dəfə təkrarlandığına görə paytaxt təmsilçisi 5000 manat cərimələnib.
Bu görüşdə “Neftçi” azarkeşləri tərəfindən kütləvi şəkildə təhqiramiz ifadələr səsləndirildiyinə və bu hal cari mövsümdə 8-ci dəfə təkrarlandığına görə “Neftçi” klub 8000 manat cərimə edilib.
Həmin oyunda “Qarabağ” azarkeşləri tərəfindən pirotexniki vasitədən istifadə edildiyinə və bu hal cari mövsümdə 4-cü dəfə təkrarlandığına görə Ağdam təmsilçisi 7000 manat cərimə edilib.
“Sabah” – “Karvan-Yevlax” oyununun 64-cü dəqiqəsində “Sabah”ın 10 nömrəli futbolçusu Aleksey İsayev ciddi qayda pozuntusuna görə birbaşa qırmızı vərəqə aldığı üçün 2 oyun oyuna buraxılmayacaq, klubu isə 1000 manat cərimə edilib.
Bu matç bitdikdən sonra meydançaya kənar şəxs daxil olduğuna və bu hal cari mövsümdə 3-cü dəfə təkrarlandığına görə “Sabah” 6500 manat cərimə edilib.
Sözügedən qarşılaşmanın 36-cı dəqiqəsində “Karvan-Yevlax”ın 19 nömrəli futbolçusu Qavi Tompson ikinci sarıdan qırmızı vərəqə aldığı üçün 1 oyun oyuna buraxılmayacaq. “Karvan-Yevlax” isə 500 manat cərimələnib.
