“Hər şey qaydasındadır. Futbolçuların hər biri oyuna yaxşı hazırlaşıb”.

Sportliqa.az xəbər verir ki, bu sözləri “Qarabağ”ın baş məşqçisi Qurban Qurbanov Avropa Liqasının pley-off mərhələsində qarşılaşacaqları “Braqa” ilə matç üçün Portuqaliyaya yollanarkən Heydər Əliyev Beynəlxalq Aeroportunda jurnalistlərə açıqlamasında deyib.

Təcrübəli mütəxəssis bildirib ki, ilk dəfə yüksəldikləri qarşılaşmadaq ən yaxşı oyunlarını göstərməyə çalışacaqlar: “Bir az həyəcan var, amma bu, normaldır. Rəqibi tanımaq üçün daha 2 günümüz var. “Braqa”nın son oyunlarında məğlub olmasının bizimlə matç üçün bir göstərici olduğuna inanmıram. Olar bilər ki, komanda son görüşdə 0:5 hesablı nəticədən sonra daha məsuliyyətli hazırlaşsın. Çünki bu, tam başqa bir turnirdir. Onlar ölkə çempionatında məğlub olsalar da, kuboku qazandılar. Hər bir oyunda fərqli motivasiya olur. Onların son qarşılaşmasını izlədim. Hesaba uyğun oyun deyildi. Hər bir halda, “Sportinq”lə görüşdə qapılarından 5 qol buraxıblar. Amma bilirik ki, onlar bizimlə oyuna tam ciddi şəkildə hazırlaşacaqlar”.

Qurbanov “Braqa”nın taktiki sxemində hər hansısa bir dəyişiklik edəcəyinə inanmadığını vurğulayıb: “Ümumilikdə orta xətdə bir az dəyişiklik ola bilər. O da rəqibdən asılıdır. Lakin onların öz oyun sistemində dəyişiklik edəcəyi inandırıcı deyil”.

“Qarabağ” da “Braqa” ilə oyunda hər hansısa ciddi dəyişiklik etməyəcək. Qurbanovun sözlərinə görə, futbolçularına bəzi əlavə tapşırıqları olacaq: “Bu, qaçılmazdır. Biz diqqətli olmalıyıq. Maksimum çalışacağıq ki, öz düşüncələrimizi meydanda yerinə yetirək. “Braqa”nın oyunçusu Simon Banzanın da böyük ehtimalla bizimlə eyni matçda heyətdə yer alması gözlənilir”.

Qeyd edək ki, “Braqa” - “Qarabağ” matçı fevralın 15-də Bakı vaxtı ilə 00:00-da start götürəcək.(idman.biz)