Minifutbol üzrə Azərbaycan milli komandası Bosniya və Hersoqovinoda keçirilən Avropa çempionatında qələbələri sıralayır.

F qrupunda mübarizə aparan yığmamız Belçika (3:0), İtaliya (2:1) və Fransa (3:1) kollektivlərinə qalib gələrək, maksimum nəticə ilə turnirin 1/8 finala vəsiqəni təmin edib.

Minfutbolçularımız bu mərhələdə Bolqarıstan seçməsi ilə qarşılaşacaq. Komandamızın qapıçısı Davud Kərimi Pressing.az-a açıqlamasında bu görüşdə də qələbə qazanmaq üçün əllərindən gələni edəcəklərini bildirib:

"Bolqarıstan millisi çox yaxşı, güclü kollektivə malikdir. Lakin biz də güclü heyətlə buradayıq. Oyuna qələbə qazanmaq üçün çıxacağıq. Komandamızda ab-hava yaxşıdır, hamı bu qarşılaşmaya köklənib. İnşallah, qalib gələrək xalqımızı sevindirməyə çalışacağıq".

Qeyd edək ki, Sarayevo şəhərində keçiriləcək oyun Bakı vaxtı ilə saat 19:30-da başlayacaq.