"Qarabağ" Azərbaycan Premyer Liqasının 8-ci turunda öz meydanında "Sumqayıt"ı 5:0 hesabı ilə məğlub edib.

Sportliqa.az xəbər verir ki, matçdan sonra keçirilən mətbuat konfransında Ağdam təmsilçisinin məşqçisi Elçin Rəhmanov jurnalistlərin suallarını cavablandırıb:

- Danışacaq çox şey yoxdur. Komanda bu gün çempionatda bəlkə də ən yaxşı oyunlarından birini keçirdi. Futbolçular tapşırıqların 100 faizini yerinə yetirdilər. 90 dəqiqə ərzində həm müdafiədə, həm də hücumda məzmunlu oyun oynadılar. Komandanı və azarkeşlərimizi təbrik edirəm. Vacib üç xal qazandıq.

- Qurban Qurbanovsuz özünüzü necə hiss etdiz? Qurban müəllim fasilədə hansı təlimatları verdi?

- Fasilədə oyundan qopmamağı, tempi axıra kimi saxlamağı tapşırdı. Qurban müəllimsiz çətin olur. Yoxluğu hiss olunurdu.

- Növbəti rəqibiniz "Hekken" son oyunda 4 qol vurdu, siz isə beş qol vurduz bu gün. Demək olar ki, onlara gözdağı verdiz?

- O haqda fikirləşmirik. Biz öz oyunumuzu yaxşılaşdırmağı düşünürük. "Hekken" oyununa ayrıca hazırlaşırıq. Cavab vermək barədə düşünmürdük. Son vaxtlarda sıx qrafikdə olurduq. Vaxtımız olacaq. Matç dördüncü gündür. Oyundan iki gün qabaq İsveçə yollanacağıq. Bizim üçün bu cür qrafik daha yaxşıdır. Komanda bərpa məşqləri edəcək. İki gün əvvəl gedəcəyik ki, uşaqlar dincəlsin. Bizim üçün müsbət haldır.

- Bədavi Hüseynovun hazırkı durumu necədir?

- "Hekken"lə görüşdə daha yaxşı Bədavi görəcəyik. Zədədən sonra oynayır. Bu gün də çox riskə atmadıq onu. Çünki "Qəbələ"də 10 nəfərlə mübarizə aparmışdıq. Onu "Hekken"lə oyuna qoruduq. Həm də altı gün ərzində daha yaxşı məşq etməsi üçün belə qərar verdik. "Hekken"lə matçda daha yaxşı fiziki durumda olacaq.

- Maksim Medvedevi bundan sonra 90 dəqiqə meydanda görəcəyik?

- Bugünkü matç onu göstərdi ki, Maksim 90 dəqiqə oynamağa hazırdır. Lazım olan anlarda bizə köməyi dəyəcək.

- Demək olar ki, artıq Andrey Lunyov əsas qapıçıdır?

- Səhv etmirəmsə, bir ilə yaxındır ki, oyun praktikası yox idi. Ona görə indi ona daha çox şans veririk. Kimin əsas heyətdə olacağı yaxın günlərdə bilinəcək. Amma son oyunlarda özünü daha yaxşı tərəfdən göstərir.