“Araz-Naxçıvan”ın yarımmüdafiəçisi Qara Qarayev dünən Azərbaycan Premyer Liqasının 3-cü turunda “Qəbələ”yə qarşı keçirilən oyundan sonra jurnalistlərin suallarını cavablandırıb.
- Oyunla bağlı nə deyə bilərsiniz?
- Çətin oldu. “Qəbələ” yeni yığılmış komanda olsa da, sistemlə oynayırlar. Son vaxtlar qələbəyə köklənmişik. Qazanılan hər 3 xal bizim üçün vacibdir. Layiqli qollar vurduq. İlk hissədə əsas işi bitirdik. Yaxşı kollektivimiz var. Daha bərk olmalı, keyfiyyətimizi artırmalıyıq.
- İkinci hissədə daha çox müdafiəyə diqqət ayırdınız. Bu, nədən irəli gəlirdi?
- Ehtiyat edirdik. Ola bilər üstünlüyü rəqibə verək. Çünki indiki məqamda gözəl oyundan çox qələbə vacibdir. Bu, məsuliyyətdən irəli gəlir.
- Komanda Konfrans Liqasında “Omoniya” ilə oyunlardan sonra psixoloji gərginliyi üzərindən ata bilib?
- Psixoloji baxımdan vəziyyət pis deyil. Haqqımızda olan düşüncələri dəyişmək üçün vaxt lazımdır. “Omoniya” həqiqətən də güclü komandadır. Heyətlərində çox yaxşı futbolçular var.
- 3 oyuna 7 xal qazanmısınız. Startı uğurlu saymaq olar?
- 3 oyuna 7 xal pis nəticə deyil. Amma bu gün nəticə həlledici rol oynamır. Əsas olan mayda hansı nəticəyə imza atmağımızdır.
- Mustafa Əhmədzadə zədəsini bərpa edib, Coşqun Diniyev transfer olunub. Demək olar ki, “Araz-Naxçıvan”ın orta xəttində sizin üçün rəqabət daha da artıb?
- Rəqabətə girəcək dövrüm deyil. Əlimdən gələni edəcəm ki, komanda yoldaşlarıma dəstək olum. Eləcə də “Araz-Naxçıvan”ın uğurlarında rolum olsun.
- “Qəbələ” ilə matçda ilk dəfə “Araz-Naxçıvan”ın kapitan sarğısını daşıdınız...
- Bu, baş məşqçinin qərarıdır. Əsas kapitanımız Urfan Abbasovun yoxluğunda kapitan mən olacam. Əlimdən gələni edəcəm ki, baş məşqçinin etimadını doğruldum.
- Bugünlərdə milli komandamızın heyəti açıqlandı və həmişə kimi “Araz-Naxçıvan”dan heç kim dəvət almadı. Buna münasibətiniz necədir?
- Bu suala baş məşqçi, klub rəsmiləri cavab versələr, daha yaxşı olar. Çünki mən hisslərimlə cavab versəm, bu da etik olmaz. Düşünürəm ki, millidə oynayacaq futbolçularımız var. Məsələ kiminsə klubda oynayıb-oynamaması da deyil. Çünki xeyli oyunçu saya bilərəm ki, milliyə klubunda oynamadan, yaxud zədəli şəkildə gəliblər, hətta yığmada zədəsini bərpa edənlər də olub. Məncə, “Araz-Naxçıvan”dakı təcrübəli uşaqlar milliyə kömək etməyə qadirdirlər. Ümid edirik ki, gələcəkdə “Araz-Naxçıvan”dan da milliyə çağırılanlar olacaq.
- Mövsümün əvvəlində bəzi klublar iddialarını ortaya qoydular, çempionluq uğrunda mübarizə aparacaqlarını açıqladılar. “Araz-Naxçıvan”ın da iddiası çempionluqdur?
- Nəinki bu gün, hətta gələcəkdə baş məşqçi, yaxud klub idarəçisi olsam belə, yenə də söz vermərəm. İdmanda söz yoxdur. Kim söz verirsə, məncə, hesablanmamış bir şeydir. İllərdir “Qarabağ”ı çempion edən Qurban müəllim belə, bu sözü demir. Ehtimal edir ki, hansısa problemlə qarşılaşa bilər. Söz vermək yox, iş görmək lazımdır.(qol.az)
